54625309 - good deal. close-up of two business people shaking hands while sitting at the working place

色彩心理學令你輕鬆增加面試官好感

農曆新年同情人節都過左,係時候係事業上繼續拼博啦。有人會選擇留係原公司努力,有唔少人就會選擇轉新工,有個新出發。面試成功係好關鍵嘅元素。正所謂“人靠衣裝”,面試時著嘅服裝其實已決定左面試官對你嘅第一印象。不過唔好以為揀岩款就夠,原來揀岩色都好重要!

首選藍

根據美國招聘網站CareerBuilder嘅統計,藍色西裝係最多打工仔嘅選擇,亦係所有顏色中最安全嘅,特別係早前好流行嘅海軍藍,俾到人一種正直誠懇,有自信嘅感覺。你唔清楚實質工作係咩時,可選擇藍色系,增加面試官嘅好感。但係如果你見嘅係一啲需要創意嘅行業,例如設計師及作家,就可能要選擇其他活潑啲嘅顏色,或者係藍色加上亮色系嘅配件,減緩藍色過於穩重嘅感覺。

https://www.pinterest.com

次選灰

同藍色一樣,灰色都係好多人嘅選擇,除左無黑色咁嚴肅拘謹,更予人有邏輯性同分析力強嘅感覺,幾乎適用於各行各業。全套灰色西裝去見工,既安全,又可以免卻配搭嘅功夫。但如果想稍作變化,可以上下身著唔同深淺度嘅灰色,或者係其他顏色嘅服裝外加上帶有細格紋嘅灰色西裝。記住“上淺下深“呢個原則,就唔會有”頭重腳輕“嘅感覺。

https://www.pinterest.com

 

成熟黑

最傳統嘅黑色西裝,標誌住專業同成熟。當你一著上黑色服裝,高貴感會自然流露,聽講仲可以俾到人一種有領導能力嘅感覺,因為黑色代表一種高權威嘅象徵。如果你係要應徵管理階層嘅工作,全黑會係你嘅不二之選。一樣都係加反一啲淺色嘅飾物,化解難以親近又過份老氣嘅印象。

http://jukelclothiers.com

 

細心白

如果話黑色係有霸氣,咁佢嘅對家白色就有乾淨,細心同組織力強嘅感覺。全白嘅西裝可能會太誇張,所以係你深色嘅服裝中適當咁加啲白色,例如最普通常見嘅白色襯衫,望落清爽又醒目。另外可選擇一啲接近白色嘅顏色,好似淺灰或米白色,一樣俾人有條理嘅形象。但一定注意,已經泛黃嘅白色服裝請即刻丟棄,因為乾淨係奠定好印象嘅基礎。
http://www.cosstores.com

 

創意黃

頭先講過,應聘需要創意或藝術感嘅工作,最好係你嘅面試服裝中加入黃色嘅元素。黃色俾人活潑,明亮,樂觀嘅感覺,令人聯想起每日起床都會見到,朝氣勃勃嘅太陽,所以適合每日都需要新想法嘅創意工作者。黃色仲可以讓人留下善於溝通嘅印象,適合工作需要面對唔同嘅人,周旋於唔同單位中嘅人。

https://s-media-cache-ak0.pinimg.com

 

壓迫紅/不專業橙

有適合嘅顏色,當然都有最要避免嘅顏色。一啲情感表達十分強烈嘅顏色,係絕對唔可以出現係面試呢類頗正式嘅場合。例如紅色,雖然俾人熱情有活力嘅感覺,但都可能令人聯想到叛逆或侵略感強,令人有壓迫感。又例如橙色,雖然係溫暖嘅暖色調,但同時都因過份親切,被25% CareerBuilder嘅受訪者選為最唔專業嘅面試用色。

https://www.halloweencostumes.com

 

雖然話工作實力係最重要,但想要發揮實力,首先你要面試成功,有一份工。所以面試時俾面試官嘅印象係十分重要,跟住上邊啲服裝顏色貼士去攻陷面試官嘅心,比起攻陷女神嘅心應該容易得多。

Leave a Reply