Tag Archives: gentlemen

風度男士Fine Dine約會前須知

對大部分女性嚟講,有風度嘅男士當然會加唔少印象分,如果想約會心儀女性,fine dining絕對係你展示gentlemen一面嘅時候,之不過約會前記得學識以下餐桌禮儀及注意事項,自然就唔怕失禮又失威!

禮讓Lady First
Lady First係基本社交禮儀,準備入餐廳時幫手開們讓女士先入,幫女生拉櫈甚至係讓女方先落單等等,只係小小舉動經已能夠show到紳士風度,唔識做就認真要抵打!

注意儀容
話明係fine dine當然要執得試試正正,尊重場合,保持儀容服飾乾淨企理,拖鞋涼鞋就絕對係大忌。

枱面乾淨
餐枱只係用嚟擺放餐具同食物嘅位置,一切個人物品,特別係容易令人分心嘅手機都係擺番落袋啦。

對侍應有禮
話晒去到高級餐廳食飯,落茶餐廳嗰種截然不同嘅豪邁落單方式一定要收起,落單嘅時候千祈唔好粗魯大叫waiter又或者指指點點。

點餐量一致
為免出現尷尬局面,要確保點餐量數同對方一致,千祈唔好因為想慳荷包就只點少量嘅食物,食物數量少過女方仲會令對方有壓力錯覺自己食量大或者貪心,所以一定要留意番!

了解餐巾位置
食飯時將餐巾擺放大脾之上,記住無須要好似口水肩咁掛喺領口前,至於要離開座位嘅話餐巾可以放喺櫈上,到最後離開餐廳就可以摺好整齊放喺餐碟旁邊。

邀請者作客
如果你身為約會飯局嘅邀請者,就盡量唔好要對方拎荷包出嚟,特別係約會心儀女仔的話就更加應該大方請客以示誠意。